ශ්‍රී ලංකාවේ වර්තමාන කලා කෘතිවල අන්තර්ගතයන් යල් පැන ගොස් හමාරයි – පියුමි ජයකලනි

 ඉතාලියේ සාහිත්‍ය දියුණුව සම්බන්ධයෙන් ඔබට කුමක් කිව හැකිද ?

ඔපෙරා, වේදිකා නාට්‍ය චිත්‍ර කලාව කැටයම් සහ මූර්ති වලින් ස්වයංපෝෂිත ඉතාලි සාහිත්‍යයේ දියුණුව පිළිබඳ විස්තර කරන්න වචන මදි. එය එතරම් රසවත්.

 පුනරුද සමයත් සමග වැඩි සාහිත්‍ය නැඹුරුවක් ගොඩ නැගීමට ඉතාලිය සමත් වෙනවා.. මෙයට හේතු පාදක වන කරුණු දේශපාලනමය නිදහස පමණක්මද ?

ඇත්තෙන්ම දේශපාලනමය නිදහස මෙයට බෙහෙවින් ඉවහල් වෙනවා.. ප්‍රවේණි ක්‍රමය බිඳ වැටී වැඩවසම් ක්‍රමය පරිහානියට පත් වූ යුගයක කුරුස යුද්ධය නිසා නව පණක් ලැබූ යුරෝපයේ වෙළඳ කටයුතු ශීඝ්‍රයෙන් දියුණු වුණා. මේ ආකාරයෙන් මධ්‍යතන යුගයට පිවිසුණු යුරෝපය උඩුයටිකුරු කල ප්‍රධානම බලවේගය වුනේ 14-16 සියවස්වල යුරෝපයේ සියලු ක්ෂේත්‍ර වල සිදුවූ නවෝදයයි.මෙම නවෝදය හෙවත් පුනරුදය බිහිවන්නේ ඉතාලිය තුළිනුයි.වැඩවසම් ක්‍රමය බිඳවැටීමත් සමඟම කලාකරුවන්ට සිතැගි පරිදි කලා කටයුතුවල නිරත වන්නට හැකියාව ලැබුණා. මෙම කාලයේදී කලා කටයුතු සඳහා වරපත් මගින් ස්වයංපාලන බලතල ලැබූ ආයතන මෙම ශාස්ත්‍රීය කලා කටයුතු වලට අනුග්‍රහය දැක්වූවා. වර්ෂ 1450 න් පසුව මෙම ශාස්ත්‍රීය කටයුතු සඳහා අනුග්‍රහය දක්වන ලද්දේ පුද්ගලික ධනවතුන්. ඉතාලියේ සාහිත්‍යය ස්වයං පෝෂණයට දේශපාලනමය හේතූන් ඉතාමත් ඉවහල් වූ බව අනිවාර්යයෙන්ම කිව යුතුයි.

සමාජවාදී දේශපාලන නැඹුරුව විසින්ඉතාලියේ සාහිත්‍ය යේ ප්‍රගමනයක් දක්නට හැකි බව විචාරකයින්ගේ මතයයි. ඔබ කෙසේද මෙය විග්‍රහ කරන්නේ ?

ඇත්තෙන්ම ඔව්. කලින් කිව්ව වගේ සමාජවාදී දේශපාලනය ඉතාලියේ සාහිත්‍ය ප්‍රගමනයට විශාල වශයෙන් බලපෑවා.

ලංකාවේ සාහිත්‍ය සමග සසදා බැලූ විට ඉතාලියේ දියුණු සාහිත්‍ය වංශයක් දැකිය හැකියි .එවැනි රටකදී ඔබගේ නිර්මාණ කාර්යයට ස්ථානයක් හිමිකර ගැනීම ගැන සදහන් කළොත්

ස්ථානයක් හිමිකර ගැනීම යනු භෞතික දෙයක්. හොඳ දෙයක් කිරීමයි වඩාත් වැදගත් වන්නේ. ඒ නිසා එවැන්නකින් ලැබෙන මානසික සතුට කිසිසේත්ම අපිට ස්ථානයක් හිමිකර ගැනීමට සමාන කරන්නට බැහැ .ඒ නිසා හොඳ දේ කිරීමෙන් ලැබෙන සතුට තමයි අපට ලැබෙන හොඳම ස්ථානය

ඔබ විසින් සම්පාදිත කෘතින් මගින් ඉතාලි සාහිත්‍යයට උදව්වක් වනවාද නැතහොත් එය ලාංකේය සාහිත්‍යයට ඉතාලි නැඹුරුවක් ගැනීමට උත්සාහ ගැනීමක් ද ?

කොහෙත්ම ලාංකේය සාහිත්‍යයට ඉතාලි නැඹුරුවක් දීමට උත්සාහ ගැනීමක් නොවේ. ඉතාලි සාහිත්‍යයට උදව්වක් වන බව නම් පිළිගත හැකියි. ඓතිහාසික සාහිත්‍යයට ඇලුම්කරන සහ දැනුම එක්රැස් කිරීමට ආශාවෙන් සිටින පිරිසකුත් ශ්‍රී ලංකාවේ ලංකාවේ සිටිනවා. ඒ නිසා මගේ ප්‍රධාන අරමුණ වූයේ මෙම කෘතිය විකුණා මුදල් කිරීම නෙවෙයි. හොඳ සාහිත්‍ය කෘතියක් පාඨකයාට දායාද කිරීමයි. ශ්‍රී ලංකාව තුල වත්මනේ පවතින බහුතරයක් වූ කලා නිර්මාණ මඟින් සිදුවන්නේ නිරුවත ප්‍රදර්ශනය කිරීමක්. ඒත් මෙතනදි මම නිරුවත කියන්නේ අඩ නිරුවත, පවුල් පසුබිම් තුළ ඇති නොයෙක් දික්කසාදවීම්, අබු සැමි සම්බන්ධතා වැනි නොයෙකුත් ප්‍රශ්න මුල් කරගත් නිර්මාණයන්. මෙවැනි දෑ රූපවාහිනියේ, අන්තර්ජාලය පමණක් නොව පොතපතේ පවා සුලබව දක්නට ලැබෙන සංසිද්ධි. මේවා යල්පැන ගොස් හමාරයි. උදාහරණයක් වශයෙන් ඉතාලිය ගත්තොත් ඉතාලියේ අතීතය මෙන්ම වර්තමාන කලාව වන්නේත් නිරුවත් කලාවයි. ඒත් ඒ නිරුවත් කලාව මගින් මිනිසුන්ගේ කාම ආශාවන් උද්දීපනය වන්නේ නැහැ. එම නිරුවත් කලාව ඉතාමත් සුන්දර ලෙස ජනතාවට දායාද කෙරෙනවා. ඒත් ශ්‍රී ලංකාව තුළ පවතින අඩ නිරුවත් නිර්මාණ තුළින් සිදු කරන්නේ මිනිසුන්ගේ කාම ආශාවන් උද්දීපනය කිරීමක්. ඔවුන් වැරදි සඳහා ඇබ්බැහි කිරීමක්. ඒත් සාහිත්‍ය කලාව මඟින් සිදුවිය යුත්තේ ජන මනස විකෘති කිරීමක් නෙවෙයි. ජන මනස සුවපත් කිරීමක්. යහපත් ජන සමාජයක් බිහි වන්නේ එවිටයි. වෑත්තෑවෙ හිමි ගර පලන්සූරිය මහගමසේකර වැනි ශ්‍රේෂ්ඨයන්ගේ සාහිත්‍ය කලාව පරදවන එකදු නිර්මාණයක්වත් ද ශ්‍රි ලංකාව තුල මම දැක නැහැ. ඒ බව මට සහතිකයි. එම නිසා වැදගත් වූ ජන සමාජයක, කලාකාමී පිරිසගේ අවශ්‍යතාවය ගැන පෙන්වා දීමද මෙම කෘතියේ එක පරමාර්ථයක්

ඔබගේ යුරෝපයේ ස්තිවාලය යන කෘතියෙහි අඩංගුව පිළිබද සදහන් කළොත් ?

මෙම කෘතියෙහි අඩංගු වන්නේ ලෝක ප්‍රසිද්ධ ඓතිහාසික ස්ථාන හා ප්‍රවාද මය කලාකරුවන් හා පුද්ගලයින් සම්බන්ධව මා ලබාගත් දැනුම යි.

ඉතාලි සාහිත්‍යය හෝ යුරෝපීය සාහිත්‍යය බොහෝ විට කතා බහට ලක් වන්නේ ඒ ඒ සාහිත්‍ය යුගයන් උත්තෘෂ්ටයට නැගීම සදහා පමණයි එහෙත් ඔබගේ ප්‍රස්තුතය වෙනස් විදියක් ගන්නේද යන්න පැහැදිලි කළොත්

ඉතාලියේ ජීවත් වන බොහෝ ශ්‍රී ලාංකිකයන් මුදල් සෙවීම් මත යාන්ත්‍රීකරණය වෙලයි සිටින්නේ. ඒ නිසා බොහෝ දෙනෙක් ඉතාලියේ පවත්නා ඓතිහාසික වටිනාකම ගැන දන්නේ නැහැ. ඒත් යුරෝපය කියන්නෙ ඉතාමත් වර්ණවත් ඉතිහාසයකට උරුමකම් කියන මහද්වීපයක්. එයිනුත් ඉතාලියට ලැබෙන්නේ සුවිශේෂී ස්ථානයක්. විශේෂයෙන් ශාස්ත්‍රීය පුනරුදය බිහිවන්නේ ඉතාලියෙන්. ඉතාලියෙනුත් ෆ්ලෝරන්ස් නගරය හරහායි මෙය සිදුවන්නේ. ඉතාලිය තුළින් සෙසු යුරෝපීය රටවල් හරහා තමයි මෙම පුනරුදය පැතිර ගියේ. ඒත් මෙම පුනරුද සමයේ බිහිවූ බොහෝ කලාකරුවන් හා විශිෂ්ටයන්ගේ වටිනා නිර්මාණ ඓතිහාසික ස්ථාන ගැන ඉතාල වාසී ශ්‍රී ලාංකිකයෝ දන්නෙ නැහැ. නොදැනුවත් කමට වඩා ඔවුන්ට අවශ්‍යතාවයක් නැති බවයි පෙනී යන්නේ. මෙය ඉතා අවාසනාවන්ත මෙන්ම කණගාටුදායක තත්වයක්.බොහෝ පිරිස් මේ දේවල් නැරඹීම සඳහා සංචාරය කිරීමට නොහැකිව පසු තැවෙමින් සිටින කාලයක ඉතාලිය වැනි කලාවෙන් ස්වයංපෝෂිත රටක ජීවත්ව ලාංකිකයන් ට මෙහි ඇති වටිනාකම යන ප්‍රස්තුතය මාජගත කරන්නටයි මට අවශ්‍ය වුණේ.

ඉදිරියේදී කුමන ආකරක කෘතියක් අපි බලාපොරොත්තු විය යුතුද

ඉදිරියේදී බොහෝ ස්ථානවල සංචාරය කිරීමෙන් හා අධ්‍යයනය කිරීමෙන් ලබාගන්නා දැනුම “යුරෝපයේ ස්තිවාලෙය 2 ” කොටස වශයෙන් එළිදැක්වීමට බලාපොරොත්තුවෙන් සිටිනවා. ඒ වගේම කතාවක් සහ කාව්‍ය සංග්‍රහයක් එළි දැක්වීමට බලාපොරොත්තුවෙන් සිටිනවා.
නව කතාවක් සහ කාව්‍ය සංග්‍රහයක්

ලංකාවේ අධ්‍යාපන හදාරා ඉතාලියේ කෘති රචනා කිරීම දක්වා යන ගමන පිලිබද අවසන් වශයෙන් සදහන් කළොත්

මම ඉගෙනීමට අත් පොත් තැබුවේ මිලාගිරිය ශාන්ත පාවුළු බාලිකා විද්‍යාලයෙන්. අපොස උසස් පෙළ හැදෑරුවේ කලා විෂයන්ගෙන්. කැළණිය විශ්ව විද්‍යාලයේ ජන සන්නිවේදනය සහ සිංහල විශයන්ගෙන් උපාධිය හැදෑරීමට පටන් ගත් නමුදු අවුරුදු දෙකක් ගතවන තැන ඉතාලියට පැමිණීමට සිදු වූ නිසා ඩිප්ලෝමාවෙන් පමණක් සෑහීමකට පත්වී ඉතාලියේ පදිංචිවීමට මට සිදුවුණා. කුඩා කල ඉඳන්ම මගේ විනෝදාංශය වුණේ ගද්‍ය පද්‍ය රචනා හා කෙටිකතා ලිවීම යි. ලිවීම සම්බන්ධයෙන් මා සිටියේ උමතුවකින් බව කිව යුතුයි. සමස්ත ලංකා කෙටිකතා ්‍ය පද්‍ය රචනා සඳහා මම සහතික පත් හිමිකරගෙන තිබෙනවා එයට අමතරව අපොස උසස් පෙළ කාලයේදී සහ පාසල් කාලයෙන් පසුවත් යම් යම් පුවත්පත්, විශේෂයෙන් සඳරේණු පුවත්පතේ (මහේෂ් රත්සර මද්දුම ආරච්චි මහතාගේ) කදුල විශේෂාංග පිටුවට, කවි සියපත ග්‍රන්ථය වැනි නොයෙකුත් නිර්මාණ සඳහා කවි නිසදැස් වැනි නිර්මාණ වලින් මම දායක වුණා. ඒත් ඉතාලියටත් පැමිණීමත් සමඟ මගේ නිර්මාණ දිවියට හා සරසවි සිහිනයටත් සමු දෙන්න සිද්ධ වුණා ඒ නිසා ඒ පසුතැවිල්ල පුංචි ප්‍රහර්ශයකට නැගීම සඳහායි මෙම කෘතිය ලියවෙන්නේ එය වසර 15ක සිහිනයක් සැබෑවීමක්. පාසල් සමයේ සිටම යුරෝපා ඉතිහාසය ට මම දක්වන්නේ ඉතාමත් කැමැත්තක්. එමෙන්ම යුරෝපා ඉතිහාසය සම්බන්ධ පොත්පත් බොහෝමයක් ඉතාලියට පැමිණීමට පෙරත් මම කියවා තිබෙනවා. මෙම ආශාව මට වර්ධනය වුණේ මගේ ඉතිහාස ගුරුතුමා වන උපුල් දිසානායක මහතා නිසා බව විශේෂයෙන් කිව යුතුයි. එම ආශාව නිසාම මෙම පොත රචනා වන්නට ඇතැයි මම විශ්වාස කරනවා.

සාකච්ඡා කලේ – තුසිත පතිරණ

 

ඉතාලියේ දී – යුරෝපයේ ස්තිවාලෙය දොරට වැඩුමෙ අවස්ථාවන්

Image may contain: 1 personImage may contain: one or more people, people sitting, child and indoorNo automatic alt text available.Image may contain: 1 person, standing and indoorImage may contain: 1 person, crowd and indoor

 

Leave a Reply

Your email address will not be published. Required fields are marked *